sru:version: 1.2; sru:query: fcs.rf="mecmua.1_77"; fcs:x-context: mecmua; fcs:x-dataview: title,full; sru:startRecord: 1; sru:maximumRecords: 10; sru:query: fcs.rf="mecmua.1_77"; sru:baseUrl: ; fcs:returnedRecords: 1; fcs:duration: PT0.035S PT0.041S; fcs:transformedQuery: /descendant-or-self::fcs:resourceFragment[ft:query(@resourcefragment-pid,<query><phrase>mecmua.1_77</phrase></query>)];

321 Şehrini aḥbābını aḥvālini
Ṣordı andan diñledi aqvālini

322 Gizli rāzın söyledi bīmār aña
Diñleyüb döndürdi sözi bir yaña

323 Diñler idi ḫaste qavlin gūşla
Nabż u ḥālin fehm ėderdi hūşla

324 Qavl‑i bīmāra qomışdı gūşını
Ḥāl ü eṭvārına ṭutdı hūşını

325 Nesneden nabżı teġayyür bulmadı
Derdi güft ü gū‑yile fehm olmadı

326 Diqqat ėtdi derdi bilmekde temām
Eyledi her cānibe sevq‑i kelām

327 Āşinā vü şehrini ẕikr eyledi
Derdini bilmekde çoq fikr eyledi

328 Dėdi şehrüñden çıqıcaq ey faqīr
Ser‑güẕeştüñ dė qalīl ü ger kes̱īr

329 Qanqı şehr içre iqāmet eyledüñ
Kimlerüñle yāḫŭ ṭuz etmek yėdüñ

330 Çün Semerqandi teẕekkür eyledi
Ḫasteye ol şehrüñ adın söyledi

331 Reng‑i rūyı nabżı oldı muḫtelif
Nite‑kim ḥarf‑i hicāda yā elif

332 Nabżı atladı vü beñzi oldı zerd
Hem ḥarāretle qılurdı āh‑i serd

333 Anda bir zer‑ger severdi cāriye
Neşʾetü l‑ʿışq‑i ʿacīb‑i sāriye

334 Hecr‑i zer‑ger ḫastesi olmışdı ol
Keşf‑i rāz eylemege bulmazdı yol

335 Çün bu rāza vāqıf oldı ol ḥekīm
Buldı tedbīre ṣırāṭ‑i müstaqīm

336 Zer‑ger‑i miskīnüñ andan meskenin
Ṣordı dėdi‑kim saña merhem benin

337 Ġātferde köpri başında olur
İsteyenler zer‑geri anda bulur

338 Bir maḥalle nāmı imiş Ġātfer
Bī‑gümān şehr‑i Semerqandda meger

339 Tesliyet qıldı marīżi ol ṭabīb
Dėdi saña ḫoş ʿilāc ėdem ġarīb

340 Şādmān u fāriġü l‑bāl ol‑ki ben
Eyleyem tedbīr‑i bārān u çemen

341 Ben ġamuñ yėrüm ṣaqın sen ġam yėme
Pādişāha sırruñı ṣaqla dėme